Фудбалската репрезентација на Аргентина беше свечено пречекана во Буенос Аирес по враќањето од Светското првенство, каде што го освои второто место, но меѓу играчите не беше капитенот Лионел Меси.
Според локалните медиуми, Меси со приватен авион отпатувал во својот роден град Росарио, поради што не присуствувал на официјалниот пречек.
Во негово отсуство, прв пред насобраните навивачи, веднаш по претседателот на Фудбалската федерација на Аргентина, излезе заменик-капитенот Николас Отаменди.
Илјадници навивачи ги поздравија аргентинските репрезентативци на улиците на Буенос Аирес и покрај поразот во финалето на Светското првенство.
Поради огромниот интерес, во последен момент беше изменет планот за пречекот, па фудбалерите низ градот се возеа со автобус со отворен покрив.
Иако во Јужна Америка во моментов е зима, пониските температури не ја намалија атмосферата, а навивачите приредија топол пречек за светските вицешампиони.
