Необичен инцидент во живо во мексиканската телевизиска емисија „Es Show“ привлече внимание на социјалните мрежи откако водителот Ернесто Чавана со нога удрил дрон, кој потоа ја погодил манекенката Изабела Рохас во лицето.
Инцидентот се случил во понеделникот, на 26 октомври, во студиото во Монтереј, Мексико. Додека дронот летал над учесниците во емисијата, Чавана се обидел да го удри со нога, по што леталото ја сменило насоката и ја погодило колумбиската манекенка и танчерка Изабела Рохас, позната како „Ла Коломбијана“.
Рохас веднаш се фатила за лицето, а нејзините колешки ѝ помогнале да излезе од кадарот. Таа му покажала на водителот расекотина на усната, која ја бришела со марамче. И покрај повредата, за време на разговорот со Чавана изгледала расположено.
По инцидентот, водителот изјавил дека ја прифаќа одговорноста за слученото. Засега нема информации дали продукцијата ќе преземе мерки или дали случајот ќе има други последици за него.
