Необични средби меѓу мршојадци и луѓе во последните денови привлекуваат големо внимание на социјалните мрежи. Големите птици се снимени како слетуваат на автомобили, па дури и на лежалки на плажите, а една од сцените е забележана на популарната плажа Мармара на Крит.
На снимката се гледа мршојадец како слетува на плажа преполна со капачи. Присуството на луѓето очигледно не го вознемирило, па птицата се сместила на лежалка под чадор и ги раширила крилјата, на изненадување на туристите.
На друга снимка, пак, мршојадец мирно стои на хаубата на автомобил кој бавно се движи.
Иако ваквите сцени може да изгледаат необично, стручњаците објаснуваат дека однесувањето може да има едноставна причина. Летото е особено тежок период за младите мршојадци на Крит, поради високите температури и опасноста од дехидратација.
Кога птиците се исцрпени и ја губат силата, може да бараат место за одмор, а понекогаш да им се приближат и на луѓето во обид да најдат помош.
Затоа, мршојадец кој ќе се појави на плажа, автомобил или на друго необично место не мора да значи дека е агресивен или дека претставува опасност за туристите. Напротив, ваквото однесување може да биде знак дека птицата е исцрпена и дека има потреба од помош.
Снимките од Крит повторно го свртеа вниманието кон влијанието на екстремно високите летни температури врз дивиот свет и тешкотиите со кои се соочуваат животните во периоди на големи горештини.
