Љубителите на возењето добија несекојдневна игра – Hop.Earth им овозможува на играчите да возат речиси по кој било пат на Земјата, користејќи географски податоци од мапи, без потреба од инсталација.
За разлика од класичните симулатори за возење, кои имаат однапред креирани мапи, Hop.Earth во реално време го генерира светот врз основа на базата на податоци на OpenStreetMap и сателитски податоци. Тоа значи дека играчите можат да се „телепортираат“ речиси каде било на планетата и веднаш да започнат со возење.
Играта функционира директно во интернет-прелистувач, па не е потребно преземање на десетици гигабајти податоци, како кај современите симулатори за возење. Светот се вчитува и се генерира во текот на играњето, додека играчот се движи, што овозможува практично неограничено истражување на различни локации.
Програмерите нагласуваат дека распоредот на патиштата, нивната поврзаност и конфигурацијата на теренот се засноваат на реални податоци, додека зградите, вегетацијата и останатите елементи од околината се поедноставени и процедурално генерирани.
Со други зборови, целта не е целосно реалистична реконструкција на секоја локација, туку создавање возачко искуство кое ја следи реалната географија.
Квалитетот на мапите зависи и од самиот проект OpenStreetMap. Регионите со детално мапирана патна инфраструктура нудат значително подобро искуство, додека во делови од светот со послабо мапирање може да има недостатоци или помалку прецизни патишта.
