Патниците кои често летаат веројатно забележале необичен, но доследен ритуал на кабинскиот персонал. Додека патниците се сместуваат пред полетувањето, екипажот е фокусиран на процедури што обезбедуваат безбеден лет.
При полетување, како и повторно при слетување, членовите на екипажот седнуваат на своите помошни седишта и заземаат посебна положба: седат исправено, со рацете поставени на бутовите или под нив. Иако тоа може да изгледа необично, зад тоа стои важна безбедносна причина.
Оваа положба не е прашање на удобност, туку безбедносна подготовка за најкритичните фази од летот.
„Во клучните фази од летот, особено при полетување и слетување, кабинскиот персонал проверува дали кабината е целосно безбедна, дали патниците се на своите места, дали ги добиле упатствата и дали се подготвени. Тоа им овозможува целосно да се фокусираат на безбедноста во најосетливите делови од летот“, вели Кетрин Дросос, стјуардеса и надзорничка на лет во компанијата Цирус Авијација Сервисис.
Она што на патниците често им изгледа како „седење на раце“ всушност е стандардна положба на подготвеност за случај на вонредна ситуација.
„Тоа е намерно заземена положба за случај на удар. Кабинскиот персонал седи исправено, со нозете цврсто на подот и рацете фиксирани на бутовите или под нозете“, објаснува Дросос.
„Таа положба го стабилизира телото, го намалува ризикот од повреди при нагли движења или турбуленција и обезбедува рацете веднаш да бидат слободни за реакција ако биде потребна евакуација или некоја друга безбедносна постапка.“
Дросос напоменува дека „точната положба на рацете или држењето може малку да се разликува од компанија до компанија или во зависност од типот на авионот“, но целта секогаш е иста: „да се одржи стабилност, будност и моментална подготвеност во најкритичните фази од летот“.
Додека се во таа положба, членовите на екипажот не се подготвуваат само физички, туку и ментално.
„Додека седат во таа положба, кабинскиот персонал прави таканаречена тивка проверка – во мислите ги повторуваат итните процедури, проверуваат каде се излезите и ги обновуваат командите за евакуација и своите задачи“, објаснува Дросос.
Станува збор за ментална вежба која им овозможува брза и ефикасна реакција во случај на реална опасност.
Од патниците не се очекува да заземаат иста положба, иако можат ако сакаат. Сепак, постојат клучни чекори со кои секој може да придонесе за сопствената безбедност за време на полетувањето и слетувањето. Најважно е внимателно да се следат безбедносните упатства што екипажот ги демонстрира пред летот и да се проучи безбедносната картичка во џебот на седиштето пред вас. Исто така е важно да се држи безбедносниот појас врзан во текот на целиот лет, како и наслонот на седиштето во исправена положба при полетување и слетување.
