Новинарката Милица Џаровска, ќерката на познатиот музички менаџер Велибор Џаровски – Џаро, сподели емотивно сеќавање поврзано со групата „Црвена јабука“ и нејзиниот татко.
Таа се присети на крајот на 1990 година, кога му кажала на Џаро дека никогаш не била во Сараево и дека многу ја сакала „Црвена јабука“, иако групата дотогаш немала настапувано во нејзиниот дом.
„Нема проблем, Миче“, ѝ рекол Џаро и веднаш организирал дочек на Нова година во Сараево, со Мишо Ковач и „Индекси“.
На 31 декември ја одвел и во клубот каде што тогаш вежбала „Црвена јабука“. Кога го виделе Џаро на вратата, тогашниот гитарист Зоран Шербеџија започнал да ја свири „Абер дојде Донке“.
„Јас паднав во несвест од среќа, се запознав и се сликав со омилените“, се присетува Милица.
Таа открива дека љубовта кон групата траела уште од детството. Како што вели, не била вљубена во Жера, но спиела со црвено јаболко во раката и одела во „Југотон“ да прашува како им се продаваат плочите. Тогаш татко ѝ ја нарекувал „тифоз“, односно најголем фан.
Со новиот состав на „Црвена јабука“, Милица продолжила да ги следи нивните настапи и во последните години, а по концертот на Античкиот театар во Скопје повторно се сретнала со Жера. Тој се фотографирал со бројните обожаватели кои чекале ред, а Милица го поздравила и го прашала како се неговите близначки.
Особено емотивен момент за неа се случил во август 2024 година, само четири месеци откако го загубила татко ѝ. На концертот на „Црвена јабука“ на Античкиот театар, Жера бил единствениот пејач, како што вели Милица, кој го спомнал Џаро.
И денес, и покрај годините, таа со иста љубов оди на нивните концерти.
