(Видео) „Од осмо одделение имав фирма за компјутери“ – Дарко Димитров за почетоците пред музиката
„Од осмо одделение имав фирма за компјутери. Продавав програми“, раскажа Дарко Димитров во „До полноќ со Принц“.
Како ученик се занимавал со програмирање и барал луѓе со кои ќе соработува. Подоцна, истото знаење го искористил за да почне да прави музика.
Првиот контакт со компјутерите го имал преку татко му, композиторот и продуцент Славе Димитров, кој користел „Комодор 64“ за музика. Во 1991 година, Дарко отишол со брат му во Германија и таму купил „Амига“. На тој компјутер ја направил преработката на „Чудна жена беше Вера“ со „Нулта позитив“.
„Го споив тоа што го работев во компјутерите, го споив во музиката“, рече Димитров.
За обработка на звукот набавил дигитализатор, а на располагање имал само четири канали. Со кратки звучни примероци го направил ритамот за песната.
„Отвори го пенџерчето“ ја испрограмирал дома. Кога дошло време за снимање, татко му го однел во студиото М2.
Дарко и претходно одел таму додека Славе работел, а овојпат првпат влегол да сними своја песна. „Таa ми е таа една прва професионална, баш професионална снимка“, се присети тој.