Стареењето не треба да се смета за болест и опасно е природниот процес да се прогласува за патолошка состојба, предупредува професорот Михаел Денкингер, претседател на Германското здружение за геријатрија.
Денкингер, кој е директор на геријатриска клиника и раководител на Институтот за геријатриски истражувања при Универзитетската клиника во Улм, вели дека постојат бројни заболувања поврзани со возраста, но дека тоа не значи дека самото стареење е болест.
Неговата критика е насочена кон трендот познат како „longevity“, односно стремежот кон што подолг и поздрав живот. За разлика од анти-ејџинг пристапот, кој најчесто се поврзува со изгледот, овој тренд се фокусира на обиди за биолошко забавување на стареењето.
Во оваа област сè повеќе се вклучуваат и инфлуенсери и индустријата, кои промовираат различни производи и методи. Како пример се наведуваат одредени пептиди за кои се тврди дека можат да го подмладат ткивото.
„За сето тоа нема докази, туку главно постојат сознанија од испитувања врз животни“, вели Денкингер, додавајќи дека досега не постои производ за кој е докажано дека го продолжува животот кај луѓето.
Според него, желбата за долг живот и здраво стареење сама по себе не е проблем. Тој посочува дека постојат добро познати начини за одржување на здравјето – редовна физичка активност, здрава исхрана, избегнување пушење, умерено консумирање алкохол, превентивни прегледи и одржување социјални контакти.
Од 23 до 26 септември во Франкфурт ќе се одржи конференција на која ќе учествуваат околу 1.000 геријатри и геронтолози. Меѓу темите ќе бидат новите терапии за Алцхајмерова болест, влијанието на климатските промени врз постарите лица, новите технологии во негата и можностите за самостоен живот.
На конференцијата ќе се дискутира и прашањето: „Дали стареењето е болест?“
