Наредните месеци носат бројни домашни забави, дружења и опуштени појадоци, што значи дека кујната треба да биде беспрекорно уредена, функционална и естетски привлечна.
Бидејќи кујната е центарот на секое собирање, важно е да ја подготвите пред да пристигнат гостите. Дизајнерите на ентериер советуваат дека постојат неколку предмети што треба да ги отстраните за да избегнете впечаток на неред и да создадете попријатна атмосфера.
Без разлика дали организирате забава или едноставно сакате кујната да изгледа поуредно, ова се трите работи што експертите препорачуваат да ги тргнете пред доаѓањето на гостите.
1. Кујнските апарати и приборот на работната површина
Кујнските апарати и садовите со прибор што секојдневно ги користиме се практични, но кога имате гости можат да создадат впечаток на неред и да заземат драгоцен простор.
Оставете ги само апаратите што ќе ви бидат потребни за подготовка на храната, а сè останато привремено складирајте го во шкафовите или фиоките.
Дизајнерката на ентериер Кети Куо советува дека отстранувањето на садовите со кујнски прибор ослободува вреден простор за пијалаци, послужавници и други работи потребни за дружењето.
„Секој сантиметар од работната површина е важен кога имате гости“, објаснува таа.
Сличен совет има и дизајнерката Џенифер Хантер, која препорачува да се отстранат држачите за салфетки, садовите со прибор и малите кујнски апарати што не се неопходни.
Наместо да ги оставите површините празни, можете да поставите еден впечатлив декоративен предмет, како убава чинија со сезонско овошје, дрвена даска за сечење или керамички бокал со свежо цвеќе.
2. Нередот на кујнскиот остров
Доколку имате кујнски остров, посветете му посебно внимание. Пред доаѓањето на гостите, оваа централна површина треба да биде чиста и ослободена од непотребни предмети.
Пренатрупаниот кујнски остров може да направи целата просторија да изгледа неуредно, а истовремено да ви го отежне движењето и послужувањето.
Дизајнерката Шени Кор советува пред гостите да пристигнат да се отстрани целиот непотребен неред, а работите потребни за послужување да се организираат покрај рабовите на кујнската работна површина, доколку просторот го дозволува тоа.
На тој начин чашите, чиниите и останатите потребни предмети ќе бидат лесно достапни, а кујната ќе изгледа поуредно и поскладно.
3. Интензивните миризливи свеќи
Палењето миризливи свеќи можеби изгледа како одличен начин да создадете пријатна атмосфера, но дизајнерите советуваат да избегнувате силни мириси во кујната, особено додека се подготвува или консумира храна.
Интензивните ароми можат да се мешаат со мирисот на храната и да го нарушат целокупното доживување при јадењето.
Кети Куо препорачува миризливите свеќи да се користат во бањата или дневната соба, подалеку од просторот каде што се подготвува и консумира храната.
Доколку сепак сакате да внесете топлина и пријатна атмосфера во кујната, подобар избор се високи свеќи без мирис, поставени во интересни свеќници.
Тие ќе создадат пријатно осветлување и декоративен ефект, без да се мешаат со мирисите на храната.
Малите промени можат да направат голема разлика. Со неколку едноставни потези, кујната може да изгледа поуредно, попространо и попривлечно за секое домашно дружење.
