Бразилскиот суд нареди итно суспендирање на платформата Х: Казната за обид за пристап до мрежата е 8.000 евра дневно

Врховниот суд на Бразил нареди „итна суспензија“ на платформата Х во земјата откако истече рокот до кој компанијата требаше да назначи правен застапник во Бразил.

Потегот во сабота, 30 август, е последен во серијата спорови меѓу Врховниот суд на Бразил и сопственикот на платформата X, Илон Маск, вклучувајќи го и замрзнувањето на финансиските сметки на сателитски интернет провајдер Старлинк во Бразил, објави Ројтерс.

Судијката на Врховниот суд Александра де Мораес нареди целосно суспендирање на платформата додека не се испочитуваат сите судски наредби, вклучително и плаќање на парични казни од 3,28 милиони долари и назначување правен застапник во Бразил.

Судот, исто така, нареди регулаторното тело за телекомуникации Анател да го изврши судскиот налог и во рок од 24 часа да му потврди на судот дека го извршил.

Судијата де Мораес, исто така, нареди поединци или компании кои ќе се обидат да пристапат до социјалната мрежа Х може да бидат казнети со парична казна од 50.000 реали (повеќе од 8.000 евра) дневно.

Платформата Х претходно рече дека очекува судијата де Мораес наскоро да ја затвори оваа мрежа.

Бразилскиот претседател Луис Инасио Лула да Силва претходно денеска изјави дека сопственикот на платформата Х, Илон Маск, мора да ги почитува одлуките на Врховниот суд на Бразил.

На почетокот на овој месец, Платформа Х соопшти дека „веднаш“ го повлекува својот преостанат персонал во Бразил, велејќи дека Мораес му се заканил на правниот претставник на компанијата во земјата со апсење, соопшти агенцијата.

Според бразилските закони за интернет, социјалните медиуми мора да имаат претставник со седиште во земјата.

Судија на Врховниот суд во Бразил отвори истрага против Илон Маск во април, откако американскиот милијардер рече дека повторно ќе ги активира сметките на платформата X, за кои судот претходно нареди блокирање, поради наводни врски со екстремната десница и ширење дезинформации на платформите.