Иако се меѓу најмалите раси кучиња во светот, чивавите во своето генетско наследство носат траги од многу поголем див роднина. Ново истражување покажало дека оваа раса дели повеќе сегменти од геномот со којотите, откритие што дава нови сознанија за нејзиното потекло.
Истражувањето, објавено во научното списание „Нејчр комјуникејшн“, го разгледува генетското наследство на чивавата и нејзините предци од Северна Америка.
Научници од Универзитетот Стенфорд користеле две нови компјутерски програми, „Гномикс“ и „Гнофикс“, кои овозможуваат истовремена анализа на геномите на голем број животни и проценка на нивните генетски врски. Со нивна помош може да се утврди потеклото на одредени делови од ДНК и да се реконструира дел од еволутивната историја.
Анализата покажала дека чивавите имаат генетски сегменти поврзани со дивиот којот (Canis latrans). Претходни истражувања веќе укажале дека чивавата и мексиканското безвлакнесто куче ксолоискуинтли, или ксоло, претставуваат мешавина од европски кучиња и кучиња што живееле во Америка пред доаѓањето на Европејците.
Новото истражување го потврдило северноамериканското генетско наследство на двете раси. Кај чивавата биле откриени сегменти поврзани со којотите, додека повеќе од четири отсто од геномот на ксоло потекнува од арктички кучиња.
Научниците не успеале да утврдат кога точно гените на којотите навлегле во генетската линија на чивавата. Сепак, според претходни истражувања, тоа најверојатно се случило пред доаѓањето на Кристофер Колумбо во Америка.
Не е познато ниту дали вкрстувањето било намерно поттикнато од луѓето или се случило природно. Научниците засега не можат да утврдат ниту дали карактеристики на денешните чивави, како нивниот самоуверен и смел карактер, се поврзани со ова генетско наследство.
Минијатурната големина на чивавата, пак, најверојатно нема директна врска со којотите. Истражувачите сметаат дека таа е резултат на долготрајна вештачка селекција, односно размножување на кучиња со посакувани особини.
Постојат докази дека мали кучиња живееле во мезоамериканските култури уште пред контактот со Европејците, но нивната директна поврзаност со денешната чивава сè уште не е целосно разјаснета.
