Џенифер Анистон, Кортни Кокс, Лиса Кудроу, Мет Лебланк и Дејвид Швимер нема да се појават во новата документарна серија на Нетфликс „The One About Matthew Perry“, посветена на животот и наследството на нивниот покоен колега од „Пријатели“, Метју Пери.
Според извори на „Page Six“, продуцентите на серијата контактирале со сите пет актери, но тие одлучиле да не учествуваат.
„Ги контактираа, но тие одлучија дека не сакаат да учествуваат“, изјавил извор за медиумот.
Друг извор тврди дека Џенифер Анистон не сакала да се вклучи затоа што за неа би било премногу тешко повторно јавно да зборува за смртта на Пери.
„Нема шанси Џен да се согласи на такво нешто. Не сака да седи пред камерите и да плаче. Не сака повторно да поминува низ тоа, особено не пред јавноста“, рекол изворот.
Пери претходно зборуваше за блискоста со Анистон, а во интервју со Дајан Соер во 2022 година откри дека токму таа од колегите од серијата најчесто му се јавувала додека се борел со зависноста.
„The One About Matthew Perry“ е триделна документарна серија во режија на добитничката на „Еми“, Мери Робертсон. На Нетфликс ќе пристигне на 27 октомври, три години по смртта на Пери.
Серијата ќе го следи неговиот пат до светската слава, но и приватните проблеми и борбата со зависноста. Ќе содржи и досега необјавени фотографии и снимки од приватната архива на семејството Пери.
Во документарецот за првпат подетално ќе зборува и неговата сестра, Миа Пери Бовик.
„Ми требаше време да бидам подготвена да ги споделам овие спомени и да зборувам за тоа како беше да го сакаш Метју низ сета сложеност на неговиот живот“, изјавила таа.
Режисерката Робертсон објаснила дека целта била да се прикаже каков бил Пери надвор од очите на јавноста, преку приказните на луѓето кои го познавале и го сакале.
Метју Пери почина на 28 октомври 2023 година на 54-годишна возраст, откако бил пронајден без свест во хидромасажна када во својот дом во Лос Анџелес.
Според канцеларијата на судскиот лекар во округот Лос Анџелес, непосредна причина за смртта биле акутните ефекти од кетаминот, додека давењето, коронарната болест и дејството на бупренорфинот биле наведени како фактори што придонеле за смртта. Смртта била прогласена за несреќен случај.
Пери со години отворено зборуваше за проблемите со алкохолот и дрогата, а искуствата со зависноста и опоравувањето ги опиша и во мемоарите „Friends, Lovers, and the Big Terrible Thing“, објавени во 2022 година.
