Ќе се снима филм за Витни Хјустон

Витни Хјустон се враќа назад на големото платно во игран филм за животот кој ја однесе до височините на славата, но заврши со зависност од дрога и со трагедија.

Долгометражниот игран филм, кој ќе го земе насловот на еден од најголемите хитови на славната дива со раскошен глас –  I Wanna Dance with Somebody – има поддршка од нејзиниот долгогодишен продуцент и ментор Клив Дејвис, соопштија продуцентите во средата.

Тие го опишаа филмот како радосна и емотивна прослава на животот и музиката на Хјустон, но додадоа дека филмот ќе биде и искрен за цената што ја плати суперѕвездата.

Хјустон, позната по хитовите I Will Always Love You и Saving All My Love for You, почина на 48-годишна возраст во 2012 година. Таа беше пронајдена мртва во својот апартман во хотелот „Беверли Хилс“, каде што престојувала како гостинка. Истрагата покажа дека таа се удавила во кадата по земањето кокаин. Трагедијата се случи во пресрет нанаградите „Греми“.

Таа водеше повеќегодишна битка со зависноста од дрога.