На денешен ден, 25 јануари 1981 година, е роден Тоше Проески, македонски пејач чиј музички талент, човечност и искрена посветеност го втемелија како една од најзначајните личности во современата македонска култура. Со својот глас и дела, Тоше одамна ги надмина границите на музиката и стана симбол на добрина, емпатија и надеж.
По повод годишнината од неговото раѓање, неговата сестра Дора и годинава ја продолжи традицијата. Таа сподели фотографија од роденденска торта посветена на својот брат – бела торта со елегантни златни детали, украсена со ангелски крилја и свеќички со бројката 45, како симболичен потсетник на годините што Тоше денес ќе ги наполнеше.
И по толку време, споменот за Тоше Проески живее преку неговата музика, хуманите дела и љубовта што ја остави кај генерации луѓе, потврдувајќи дека вистинските вредности не згаснуваат со времето.
