Новак Ѓоковиќ е меѓу тенисерите кои добија парична казна на овогодинешниот Вимблдон поради прекршување на Кодексот на однесување.
Организаторите на турнирот соопштија дека седумкратниот шампион ќе треба да плати 5.600 фунти поради гласно изговорена пцовка за време на натпревар од главниот турнир.
Иако не е наведено на кој меч се однесува казната, според британските медиуми најверојатно станува збор за осминафиналниот дуел против Роман Сафиулин. Тогаш, по загубен сервис на почетокот од третиот сет, Ѓоковиќ бурно реагираше и доби официјално предупредување од главниот судија.
Подоцна во истиот натпревар, српскиот тенисер повторно го покажа своето незадоволство откако по еден поен ја удри топката надвор од теренот.
По мечот, Ѓоковиќ призна дека не е горд на својата реакција.
„Понекогаш помага да го исфрлите она што се насобрало во вас. Не сум горд кога добивам опомена или кога ја губам контролата. Тоа не е нешто што го сакам, но кога ќе се случи, се обидувам што побрзо да продолжам понатаму и да се фокусирам на следниот поен“, изјави тој.
На листата на казнети тенисери се најде и српскиот тенисер Хамад Меѓедовиќ, кој беше санкциониран со 3.700 фунти, исто така поради гласно изговорена пцовка. Меѓу казнетите се и Хуберт Хуркач, Жоао Фонсека, Дамир Џумхур, Танаси Кокинакис, Корентен Муте и Џулијан Кеш поради различни прекршувања на правилата за однесување.
