Српскиот тенисер Новак Ѓоковиќ изјави дека пред почетокот на Вимблдон е многу подобро подготвен отколку што беше за неодамнешниот Ролан Гарос.
„Мојата физичка состојба е поинаква во споредба со периодот кога дојдов на Ролан Гарос. Мислам дека за Вимблдон сум многу подобро подготвен. Секако, кога се игра на трева, за разлика од земјена подлога, не е потребно да се вложува толку голем физички напор. Тоа дефинитивно ми одговара. Отсекогаш сум сакал да играм на трева. Тука имам многу добар биланс и историја на резултати, што ми дава дополнителна самодоверба пред почетокот на турнирот“, изјави Ѓоковиќ на прес-конференција.
Противник на Ѓоковиќ во првото коло на Вимблдон ќе биде Јибинг Ву, а нивниот натпревар е закажан за понеделник по 18 часот.
