Фудбалската репрезентација на Мароко ќе биде значително ослабена во вечерашното четвртфинале на Светското првенство против Франција, откако најдобриот стрелец на тимот, Исмаел Саибари, не успеа да се опорави од повредата.
Мароканскиот репрезентативец, кој досега постигна три гола на Мундијалот и беше еден од најзаслужните за историскиот пласман меѓу осумте најдобри селекции, нема да биде во составот за натпреварот што започнува во 22 часот во Бостон.
Саибари се повреди на осминафиналниот натпревар против Канада, а во мароканскиот табор до последен момент се надеваа дека ќе биде подготвен за дуелот со Франција.
Селекторот Мохамед Уахби потврди дека офанзивецот нема да може да им помогне на соиграчите.
„Саибари денес нема да настапи. Се надевам дека ќе биде подготвен за следниот натпревар“, изјави Уахби.
Во меѓувреме, добрите настапи на Саибари на Светското првенство му донесоа и трансфер во Баерн Минхен, реализиран во текот на шампионатот.
