Одличните настапи на Матија Лукиќ на Светското првенство за кошаркари до 17 години му донесоа големо признание – 16-годишниот талент доби повик да се приклучи на сениорската репрезентација на Србија.
Со своите игри и континуираниот напредок, Лукиќ го привлече вниманието на селекторот Душан Алимпијевиќ, кој реши да му даде можност да биде дел од најсилниот национален тим.
Младиот кошаркар зад себе има успешна сезона во шпанска Сарагоса, каде што дебитираше за сениорскиот тим, а настапуваше и за селекцијата до 22 години.
Лукиќ беше еден од најзаслужните за сребрениот медал што Србија го освои на Светското првенство до 17 години, генерација која претходно ја освои и европската титула, потврдувајќи дека претставува една од најперспективните во српската кошарка.
Душан Алимпијевиќ уште претходно најави дека дел од играчите од оваа генерација ќе добијат шанса во сениорскиот состав, а во стручниот штаб ќе биде и Стеван Мијовиќ, селекторот кој ја предводеше репрезентацијата до 17 години.
Србија во август ги продолжува квалификациите за Светското првенство 2027, кога ќе ги одигра натпреварите против Исланд и Италија во втората рунда.
