Се враќа хит-криминалистичката серија „MobLand“: Почна снимањето на третата сезона
Снимањето на третата сезона на популарната криминалистичка серија „MobLand“ официјално започна, а во актерската екипа повторно се враќаат Том Харди, Хелен Мирен и Пирс Броснан.
Том Харди повторно ќе го толкува Хари да Соуза, човекот задолжен за решавање на најчувствителните проблеми на моќното криминално семејство Хариган. Хелен Мирен и Пирс Броснан повторно ќе ги играат Мејв и Конрад Хариган, предводниците на оваа криминална династија, пренесува „Варајети“.
Почетокот на снимањето доаѓа по шпекулациите дека Харди би можел да ја напушти серијата поради наводни несогласувања со продуцентот Дејвид Глејзер и сценаристот Џез Батерворт. Се појавија тврдења дека актерот доцнел на снимањата и барал измени во сценариото.
Сепак, како што претходно објави американскиот медиум, информациите за неговото заминување биле предвремени. Продуцентите, меѓу кои и Гај Ричи, сакале Харди да остане дел од серијата, а несогласувањата во меѓувреме биле надминати.
Глејзер на премиерата на втората сезона во Лондон особено го пофалил Харди, нарекувајќи го „капетан на нашиот брод“ и истакнувајќи дека актерот останал со серијата до самиот крај.
Покрај главната тројка, во серијата играат и Педи Консидин, Џоана Фрогат, Лара Пулвер, Ансон Бун, Мандип Дилон, Џони Флин и Тоби Џонс.