Жените добиваат исто право како мажите: Во германски град се дозволува капење без горен дел од костимот
Жените во германскиот град Хајделберг од следната летна сезона ќе можат да се капат во отворените базени без горниот дел од костимот за капење, исто како и мажите. Одлуката ја донесе градскиот совет, кој наложи промена на правилникот за користење на базените.
Предлогот бил прифатен по иницијатива на советничката група на Социјалдемократската партија на Германија (СПД), како и заедничката советничка група на партијата Левица (Die Linke) и Бунте Линке (Bunte Linke).
Според портпаролот на градот, новото правило ќе стапи на сила со почетокот на следната сезона за капење и ќе важи исклучиво за отворените базени во Хајделберг, но не и за затворените базени.
Досега, според куќниот ред и правилникот на градското претпријатие „Штатверке Хајделберг“, кое управува со базените, само мажите имале право да се капат без горниот дел од костимот за капење, додека за жените тоа било забрането.
Во образложението на предлогот било наведено дека ваквото правило е спротивно на заложбите на градот за родова еднаквост и борба против дискриминацијата.
Целта е на сите граѓани, без оглед на полот или родовиот идентитет, да им се овозможи еднаков пристап и користење на јавните содржини.
Градското претпријатие „Штатверке Хајделберг“, кое управува со базените, претходно го одбило предлогот за дозволување капење без горниот дел од костимот и за жените. Сепак, градскиот совет сега наложил соодветна измена на правилникот.
Властите задржуваат можност повторно да ги изменат правилата доколку се појават несакани ситуации.
Со оваа одлука, Хајделберг им се приклучува на сè поголем број градови и општини во германската покраина Баден-Виртемберг, каде што капењето без горниот дел од костимот е дозволено без оглед на полот, целосно или под одредени услови.
Правилата се разликуваат од град до град. Во Карлсруе ваквото капење е дозволено, во Пфорцхајм важат одредени ограничувања, додека во Хајлброн сè уште е забрането.