Нутриционистката Келси Куник откри дека грчкиот јогурт е намирница што речиси секојдневно ја вклучува во својата исхрана, наведувајќи дека секогаш има барем две пакувања во својот фрижидер.
Таа за „EatingWell“ изјави дека грчкиот јогурт го консумира како дел од оброците, но и како ужина, бидејќи го смета за една од најхранливите и најпрактичните намирници.
Според Куник, грчкиот јогурт е богат со протеини и пробиотици, а истовремено е многу разновиден и лесно може да се комбинира со различни јадења. Таа препорачува да се избираат производи со што е можно помала количина додаден шеќер.
Нутриционистката објаснува дека грчкиот јогурт се добива со процес на цедење, поради што е погуст и содржи повеќе протеини од обичниот јогурт. Протеините, вели таа, придонесуваат за одржување на мускулната маса, подолго чувство на ситост и постабилно ниво на шеќер во крвта.
Дополнително, бидејќи станува збор за ферментиран производ, грчкиот јогурт содржи живи и активни култури на корисни бактерии кои го поддржуваат здравјето на цревниот микробиом. Истражувањата покажуваат дека неговата редовна консумација може да биде поврзана со помал ризик од дијабетес тип 2 и полесно одржување на здрава телесна тежина.
Куник истакнува дека грчкиот јогурт го користи во различни оброци – од појадок и ужина до вечера, а често со него ги заменува киселата павлака и мајонезот.
Таа додава дека, иако со текот на годините потешко ја поднесува лактозата, грчкиот јогурт и понатаму може редовно да го консумира без непријатни последици.
