Американската актерка Хали Бери претрпе неуспех во судскиот спор за старателството над 13-годишниот син Масио, кого го има со поранешниот сопруг Оливие Мартинез. Судот одлучи момчето поголемиот дел од времето да го поминува со татко му, а престојувањето преку ноќ кај мајка му повеќе нема да биде дозволено, објави ТМЗ.
Со истата одлука е укината и претходно изречената забрана за приближување на Мартинез, поврзана со обвинувања за семејно насилство.
Адвокатот на Мартинез, Патрик Багдасеријанс, потврди дека поранешните сопружници досега го делеле старателството, но судот одлучил момчето отсега првенствено да живее со татко му. Барањето на адвокатите на Бери синот да поминува подеднакво време со двајцата родители било одбиено.
Сепак, двајцата родители и натаму заеднички ќе одлучуваат за важните прашања поврзани со образованието и здравствената грижа на нивниот син.
Спорот меѓу актерката и Мартинез трае со години, а во судската постапка беа изнесени и сериозни обвинувања. Мартинез претходно тврдеше дека Бери го давела нивниот син, што таа категорично го негираше. Момчето беше сослушано на затворено рочиште, без присуство на родителите.
Бери се противеше на неговото сведочење, тврдејќи дека Мартинез влијае врз него и го подготвува за настапот пред судот. Сепак, судот одлучи да го сослуша.
Внимание привлече и објава на профилот на Бери на Инстаграм, во која се наведува дека односот на детето со мајката може да биде поврзан со неговиот однос со таткото. Се појавија сомневања дека профилот бил хакиран, но околностите не беа разјаснети. Адвокатскиот тим на Мартинез побара повторно отворање на доказната постапка поради објавата, но судијата го одби барањето.
Судската одлука за старателството останува во сила, а Масио поголемиот дел од времето ќе го поминува со татко му.
