Европските хибридни автомобили со надворешно електрично полнење во реални услови испуштаат значително повеќе јаглерод диоксид отколку што покажуваат официјалните пресметки, се наведува во нова студија на Меѓународниот совет за чист транспорт (ICCT).
Според анализата, емисиите на CO₂ кај таканаречените plug-in хибриди регистрирани од 2021 до 2023 година биле во просек 3,5 пати повисоки од вредностите добиени при хомологационите тестирања во 2021 година. Кај возилата од 2023 година разликата се зголемила на 4,6 пати.
Главната причина, според ICCT, е тоа што возачите ги полнат овие автомобили поретко и поминуваат помал дел од времето во целосно електричен режим отколку што се претпоставувало при пресметките врз кои се темели европската регулатива.
Plug-in хибридите комбинираат електричен мотор со бензински или дизел мотор, а батеријата може да се полни преку надворешен извор на електрична енергија. Кога батеријата е наполнета, возилото може да се движи само на електричен погон, додека при подолги патувања или поголема потреба од моќност се вклучува моторот со внатрешно согорување.
Питер Мок, директор на европскиот огранок на ICCT, вели дека зголемувањето на електричниот досег кај поновите модели не довело до поголема употреба на електричниот режим во реалноста.
Од ICCT предупредуваат дека ревизијата на методологијата за пресметување на емисиите, која се очекува следната година, веројатно ќе ја намали улогата на plug-in хибридите како средство со кое производителите ги исполнуваат европските цели за намалување на емисиите на CO₂. Тоа, според организацијата, би можело дополнително да влијае и врз нивниот пазарен удел.
Од јануари до јули 2026 година plug-in хибридите сочинувале околу 10 отсто од новорегистрираните автомобили во Европа, наспроти 9 отсто во истиот период минатата година. Целосно електричните автомобили достигнале пазарен удел од 22 отсто.
Студијата доаѓа во период кога во ЕУ се води дебата за иднината на автомобилската индустрија и за тоа кои технологии треба да бидат дел од стратегијата за декарбонизација. Дел од производителите, особено од Германија, се залагаат за поголема улога на хибридните возила.
На иницијатива на Германија, Европската комисија во декември предложи поголема флексибилност во однос на првично планираната забрана за продажба на нови автомобили со мотори со внатрешно согорување од 2035 година. Според предлогот, производителите би требало да ги намалат емисиите на CO₂ за 90 отсто во однос на 2021 година, а преостанатите 10 отсто да ги компензираат.
Сепак, седум земји, меѓу кои и Франција, во јуни повикаа ЕУ да го задржи амбициозниот курс кон електричните автомобили.
