Платформата „Икс“ (X) воведува нови мерки против кражбата на содржини, најавувајќи дека заработката од монетизирани прегледи на украдени видеа и текстуални објави ќе им биде пренасочена на нивните оригинални автори.
Компанијата соопшти дека најновата верзија на моделот за вештачка интелигенција „Грок“ (Grok AI) може трипати побрзо да препознава дуплирани содржини во споредба со претходната верзија.
Според Никита Бир, додавањето водени жигови, воведни шпици или други измени со цел украдената содржина да изгледа како оригинална нема да помогне, бидејќи приходите од таквите објави ќе бидат пренасочени кон вистинскиот автор.
Новите правила ќе важат и за копирани текстуални објави, а не само за видеосодржини.
Бир соопшти дека во последниот циклус биле откриени околу 1,5 милиони украдени објави, без да прецизира на кој временски период се однесува анализата. Според него, благодарение на новите мерки, повеќе од еден милион американски долари ќе им бидат исплатени на оригиналните автори, наместо на профилите што ја презеле нивната содржина.
Покрај борбата против плагијатите, платформата работи и на побрзо откривање и отстранување на автоматизирани профили. Бир претходно објави дека „Икс“ суспендира околу 208 ботови во минута, а тој број постојано расте.
Од компанијата најавуваат и построги санкции за корисниците кои повеќепати ќе се обидат да ги заобиколат новите правила. Таквите профили ќе бидат исклучени од програмата за креатори, а истото ќе важи и за оние што користат таканаречен „лов на интеракции“ – објави со кои се бара од корисниците да лајкуваат, коментираат или следат профил во замена за некаква награда.
Како пример се наведуваат објави од типот: „Ќе го заследам секој што ќе одговори“. Доколку корисник три или повеќе пати биде фатен дека користи вакви практики, неговиот профил ќе биде отстранет од програмата за креатори и ќе биде проследен до тимот задолжен за безбедност и правилата на платформата, со можност за суспензија на сметката.
Никита Бир и претходно јавно го критикуваше користењето на вакви техники за привлекување интеракции, а во една прилика го посочи и популарниот креатор MrBeast, обвинувајќи го дека често користи финансиски мамки за да привлече што повеќе прегледи на своите видеа.
