Мексико конечно стави крај на долгогодишната низа разочарувања во нокаут-фазата на Светските првенства, совладувајќи го Еквадор со 2:0 и обезбедувајќи пласман во осминафиналето пред своите навивачи во Мексико Сити.
Со оваа победа, Мексиканците за првпат по Светското првенство во 1986 година успеаја да го добијат првиот елиминациски натпревар. По настапот кога стигнаа до четвртфиналето, следуваа седум последователни елиминации уште на првата нокаут-пречка, а на претходниот Мундијал во Катар не успеаја ниту да ја минат групната фаза.
На годинашниот шампионат Мексико игра во одлична форма. Во групната фаза забележа максимален ефект со победи над Јужна Африка (2:0), Јужна Кореја (1:0) и Чешка (3:0), додека Еквадор обезбеди место во нокаут-фазата како третопласирана селекција во својата група со четири освоени бода.
Почетокот на средбата беше одложен за еден час поради силно невреме со грмотевици, но по создавањето услови за игра домаќинот веднаш ја презеде иницијативата.
Првиот гол беше постигнат во 22. минута, кога Хулијан Кињонес, по асистенција на Роберто Алварадо, прецизно стрелаше за водство од 1:0.
Само девет минути подоцна Раул Хименез го зголеми водството. По грешка на одбраната на Еквадор и добро изработена акција, искусниот напаѓач со силен удар од работ на шеснаесетникот ги постави конечните 2:0.
Во второто полувреме Мексико целосно го контролираше натпреварот и беше поблиску до трет погодок отколку Еквадор до намалување на резултатот.
Гостите мечот го завршија со играч помалку, откако Педро Хинкапие во 90. минута доби директен црвен картон. По консултација со ВАР, словенечкиот судија Славко Винчиќ го исклучи поради несоодветно однесување кон противнички фудбалер.
Натпреварот ќе остане запаметен и по настапот на Гилберто Мора, кој со 17 години и 259 дена стана вториот најмлад фудбалер во историјата што започнал натпревар од нокаут-фазата на Светско првенство во почетниот состав. Пред него на оваа листа останува само легендарниот Пеле.
Во осминафиналето, Мексико ќе се соочи со победникот од дуелот меѓу Англија и Демократска Република Конго.
