Богатите припадници на генерацијата З трошат значително повеќе пари за уметнички дела од купувачите од сите постари генерации, покажува истражување објавено од меѓународната организација „Арт Базел“, која организира саеми за современа уметност, и швајцарската банка УБС.
Истражувањето опфатило 3.100 богати купувачи и покажало дека припадниците на генерацијата З во текот на 2025 година и првата половина од 2026 година трошеле двојно повеќе за уметнички дела од припадниците на постарите генерации. Во истражувањето, генерацијата З ги опфаќа лицата на возраст од 20 до 29 години.
Втори најголеми потрошувачи биле припадниците на генерацијата на бејби-бумерите, на возраст од 62 до 80 години. По нив следуваат миленијалците, на возраст од 30 до 45 години, додека богатите припадници на генерацијата Икс, на возраст од 46 до 61 година, биле најштедливи при купувањето уметнички дела, пренесе „Ројтерс“.
Припадниците на генерацијата З опфатени со истражувањето во просек потрошиле 347.000 долари за уметност во текот на минатата година. За споредба, просечната потрошувачка кај припадниците на генерацијата Икс изнесувала 79.000 долари.
Околу 40 отсто од младите испитаници навеле дека семејното влијание било главната причина поради која започнале да собираат уметнички дела.
Истражувањето покажало дека помладите колекционери и понатаму претпочитаат традиционални уметнички форми, како сликарството и скулптурата. Речиси половина од испитаниците изјавиле дека при изборот им се поважни уникатноста и реткоста на делото отколку неговата проценета вредност кај стручњаците или другите колекционери.
Во истражувањето учествувале лица чијашто нето-имотна состојба во 2026 година надминува еден милион долари, без да се пресметуваат вредноста на недвижностите и имотот во приватни компании.
Податоците покажуваат и дека вештачката интелигенција сè почесто се користи при изборот и купувањето уметнички дела. Денес околу 22 отсто од колекционерите користат алатки со вештачка интелигенција, во споредба со само четири отсто во 2024 година.
