Песната „Bass“ на рапери Јала Брат и Буба Корели од БиХ е дел од музичката подлога на новата бразилска серија „Граници на алчноста“ (The Gift of Deceit), која се прикажува на Нетфликс.
Веста ја објави нивната издавачка куќа, а информацијата привлече големо внимание кај обожавателите на популарното дуо.
Издавачката куќа Imperia ја сподели веста на Инстаграм, заедно со графика на која пишува „Јала и Буба на Нетфликс“, како и постерот од серијата.
Песната „Bass“ беше објавена во декември 2024 година, како дел од албумот „Goat Season: Final Chapter“.
„Граници на алчноста“ е бразилска драмска серија од десет епизоди, чија приказна е сместена во Рио де Жанеиро.
Приказната ја следи колекционерката на уметнички дела Лусија Розети, која очајнички се обидува да пронајде лек за мистериозната болест на својата ќерка Маира.
Откако лекарите не успеваат да ѝ помогнат, таа се обраќа кај духовна терапевтка, но потрагата по спас се претвора во измама која открива мрачни тајни на две семејства.
Правата за користење на песната во серијата се регулирани преку компанијата EMDC Publishing, која работи во рамките на групацијата EMDC Network.
Овој ангажман претставува уште еден чекор во меѓународната промоција на музичкиот каталог на нивните партнери и можност музиката на Јала Брат и Буба Корели да допре до публиката надвор од Балканот.
Појавувањето на нивната песна во бразилската серија покажува како регионалната музика наоѓа пат до меѓународните продукции и до нови слушатели.
