Изборот за новиот Џејмс Бонд влегува во следната фаза, а меѓу актерите кои би можеле да се појават на пробните снимања се Калум Тарнер и Џек Лоуден. Снимањата би требало да се одржат во Лондон, а според некои извори, би можеле да започнат уште во петок, објави „Холивуд репортер“.
Тарнер е познат по романтичната комедија „One Night Only“, додека Лоуден привлече внимание со улогата во серијата „Slow Horses“. Засега не е потврдено колку актери ќе добијат можност да им се претстават на продуцентите. Според дел од изворите, се разгледуваат најмалку тројца кандидати, додека други наведуваат дека бројката би можела да достигне пет.
Од актерите ќе се очекува да покажат дека можат да ја доловат препознатливата елеганција на британскиот таен агент, но и да одговорат на физичките барања на улогата.
Претходно се шпекулираше дека во изборот би можел да учествува и Џек О’Конел, познат по филмот „Sinners“, но најновите информации укажуваат дека тој нема да биде дел од оваа фаза. Ниту Џејкоб Елорди, познат по серијата „Euphoria“ и филмот „Frankenstein“, не е меѓу актерите кои ќе одат на пробно снимање.
Новиот филм за Џејмс Бонд ќе го режира Дени Вилнев, познат по филмскиот серијал „Дина“, додека продукцијата ќе ја водат Ејми Паскал и Дејвид Хејман.
„Амазон“ ги презеде креативните права за филмскиот серијал од семејството Броколи во февруари 2025 година, со што започна ново поглавје во развојот на филмовите за познатиот таен агент.
