Телефоните на преклоп, кои со години беа меѓу најпопуларните мобилни уреди, сè повеќе исчезнуваат од пазарот. Овој тренд ја зафати и Јапонија, каде што специфичните модели познати како „гара-кеи“ опстанаа многу подолго отколку во другите делови на светот.
Називот „гара-кеи“ потекнува од изразот „Galapagos keitai“ и се однесува на телефони развиени според посебните потреби на јапонскиот пазар. Овие уреди имаа физички копчиња, издржливи куќишта и функции што во одредени периоди беа пред своето време.
Покрај разговорите и пораките, некои модели овозможуваа гледање телевизија, пренесување контакти преку инфрацрвена врска и бесконтактно плаќање превоз и купувања. Препознатливи беа и по живите бои, необичниот дизајн и можноста за додавање украсни приврзоци.
Подоцна се појавија и хибридни модели со оперативниот систем Андроид и поддршка за 4G, но ниту тие не успеаја да го запрат преминот кон паметните телефони.
Според истражување на „Докому“, во 2021 година паметни телефони користеле околу 90 отсто од сопствениците на мобилни телефони во Јапонија, а во 2025 година нивниот удел достигнал приближно 98 отсто. Во меѓувреме, испораките на класични мобилни телефони во првата половина на фискалната 2025 година се намалиле за повеќе од 25 отсто, на помалку од 400.000 уреди.
Дополнителен удар е гасењето на старите мобилни мрежи. „Ен-ти-ти Докому“ ја исклучи преостанатата 3G услуга во март 2026 година, додека операторите „Ау“ и „Софтбанк“ го направија тоа во 2022 и 2024 година.
Иако дел од корисниците повторно покажуваат интерес за едноставни телефони без бројни апликации и известувања, традиционалните јапонски модели се соочуваат со проблеми со мрежната компатибилност.
„Гара-кеи“ телефоните остануваат дел од технолошкото наследство на Јапонија, но преминот кон современи мобилни мрежи и дигитални услуги го прави нивното исчезнување сè поверојатно.
