Околу 20.000 луѓе присуствуваа на концертот на американскиот рапер Меклмор во распродадената „Акор арена“ во Париз, во рамките на неговата турнеја „Слободна Палестина“. Приходите од настапите се наменети за 12 организации што обезбедуваат хуманитарна помош и ги поддржуваат правата на Палестинците.
Ова беше вториот од вкупно три концерти во рамките на турнејата, а покрај Меклмор настапија и Пом, Аурора, „Португал. Д Мен“ и други уметници, објави „БФМ ТВ“.
Меѓу гостите беа палестинскиот рапер Тамер Нафар, пејачката Зејна, актерката Карис ван Хутен и специјалната известувачка на ОН за окупираните палестински територии, Франческа Албанезе.
Меклмор ја започна турнејата откако во септември беше отстранет од турнејата на Ед Ширан во САД. Тоа се случи по неговиот настап во Њу Џерси, кога извика „Слободна Палестина“ и им порача на Палестинците дека не се заборавени.
На концертот во Париз ги изведе своите најголеми хитови, меѓу кои и песната „Hinds Hall“, чии приходи беа донирани на Агенцијата на ОН за палестински бегалци (UNRWA).
Раперот рече дека со турнејата сака да повика на ослободување на Палестина и да испрати порака за љубов, слобода и единство. Тој нагласи дека сите луѓе заслужуваат да живеат безбедно, да бидат сакани и почитувани, да имаат свој дом и земја. Додаде дека неговата порака се однесува и на луѓето во Либан, Конго, Судан, Куба, Хаити и САД.
За време на говорот на Меклмор, дел од публиката скандираше „Макрон, поднеси оставка“. Раперот ја изведе и својата нова песна „Where’s Our Love“, посветена на недостигот од човечност во светот погоден од насилство.
Турнејата „Слободна Палестина“ ќе заврши со концерт во Лондон, по претходните настапи во Даблин и Париз.
