Лионел Меси продолжува да ги поместува границите на светскиот фудбал. Капитенот на Аргентина испиша нова страница во историјата, откако стана првиот фудбалер што постигнал гол на седум последователни натпревари на Светските првенства.
До историското достигнување стигна на натпреварот од последното коло во групната фаза против Јордан, кога во 80. минута со мајсторски изведен слободен удар го постигна единствениот гол за победа од 1:0.
Претходно, токму врз Меси беше направен прекршок на работ од шеснаесетникот, по што тој прецизно шутираше по земја низ живиот ѕид и ја погоди долната лева страна од голот.
Со овој погодок аргентинскиот ас стигна до својот 19. гол на Светските првенства, дополнително подобрувајќи го сопствениот рекорд по бројот на постигнати голови на мундијалите.
Воедно, ова беше негов 72. гол од слободен удар во професионалната кариера, односно 12. во дресот на аргентинската репрезентација.
Меси сега има 123 голови на 202 настапи за националниот тим и се наоѓа на второто место на вечната листа на репрезентативни стрелци. Пред него е само Кристијано Роналдо со 145 погодоци.
Пред да стане единствен рекордер, Меси го делеше достигнувањето со легендарниот Французин Жист Фонтен и Бразилецот Жаирзињо, кои своевремено постигнуваа голови на шест последователни натпревари на Светските првенства.
