Иднината на телевизијата „Пинк“ останува неизвесна по најавата за масовни отпуштања во компаниите на Жељко Митровиќ, сопственикот на „Пинк медиа груп“. Тој ги коментираше шпекулациите за можно затворање на телевизијата, но не даде конкретен одговор, објави српскиот „Блиц“.
Гостувајќи во емисијата „Хит твит“, Митровиќ на прашањето дали „Пинк“ ќе престане со работа одговори дека треба да се прецизира за кој „Пинк“ станува збор, бидејќи, како што рече, постојат околу 80 телевизии под тој бренд.
„Тоа е само бренд, телевизијата е програма, а не нејзин бренд. Не е толку лесно“, изјави Митровиќ, без да открие какви промени се планираат.
Неговата изјава доаѓа неколку дена откако на Инстаграм објави дека ги распуштил сите ансамбли на театарот „Одеон“, поради што 150 лица останале без работа. Тој најави и дека во рамките на системот ќе мора да отпушти околу 1.000 работници од десетина компании кои, според него, сè уште не успеале да постигнат финансиска стабилност.
Митровиќ одлуката ја опиша како еден од најтешките денови во животот, наведувајќи дека ја донел со многу емоции и разбирање кон вработените.
