Дали машината за миење садови воопшто треба да се чисти? Да, а особено важно е да се обрне внимание на гумата на вратата.
Најпрво треба да разбереме зошто е потребно да се чисти гумата, кога таа се наоѓа во внатрешноста на уред кој е наменет токму за миење садови.
„Гумата се наоѓа во топла и влажна средина, па со текот на времето на неа природно се насобираат влага, остатоци од храна и наслаги од детергентот“, објаснува Ејми Черноф, експертка за домашни апарати и потпретседателка за маркетинг во компанијата AjMadison, пишува Southern Living.
Таа истакнува дека наборите и аглите се особено подложни на насобирање нечистотија бидејќи не се изложени на истото директно дејство на водата како внатрешноста на машината.
Па, како правилно да ја исчистите гумата на машината за миење садови?
За среќа, потребни ви се само неколку едноставни работи: крпа од микрофибер, мек сунѓер или четка за заби со меки влакна.
Кога станува збор за средствата за чистење, доволни се благ детергент за миење садови и топла вода.
„Целта е да ги отстраните наслагите, а притоа да не ја исушите, изгребете или оштетите гумата“, вели Черноф.
Измешајте топла вода со мала количина благ детергент за миење садови.
Натопете мека крпа во растворот и нежно избришете ја целата гума. Посебно внимание обрнете на наборите и аглите.
За тврдокорните наслаги можете да користите мека четка за заби, но избегнувајте силно триење и не ја влечете силно гумата.
Можеби ќе помислите дека силните хемиски средства се најдобриот избор за ваква работа.
Сепак, Черноф советува да ги избегнувате, вклучително и белилото, како и абразивните сунѓери и острите предмети. Тие можат да оштетат одредени гумени делови, но и внатрешноста на машината од нерѓосувачки челик.
Черноф препорачува гумата накратко да ја пребришете еднаш месечно. Меѓутоа, доколку забележите наслаги, непријатен мирис или видлива нечистотија, исчистете ја и порано.
Ако машината за миење садови ја користите секојдневно, треба почесто да ја проверувате.
Исто како и со работните површини во кујната, остатоците од храна избришете ги веднаш штом ќе ги забележите.
Исто така, Черноф советува гумата меѓу темелните чистења да биде сува и да не ја затворате вратата на машината преку прибор за јадење или големи садови кои би можеле да ја притиснат или приклештат гумата.
„Вреди повремено да ја проверувате и поради пукнатини, разлабавеност или вкочанетост, бидејќи чистењето не може да ја поправи гумата која е физички оштетена“, заклучува Черноф.
