МЗТ Скопје Аеродром официјално потврди дека во сезоната 2026/27 ќе настапува во групната фаза на ФИБА Европа Купот, со што клубот повторно ќе биде дел од европските натпреварувања по пауза од две и пол децении.
За „сино-белите“ ова претставува нов значаен чекор во развојот на клубот, кој следната сезона ќе се натпреварува на три фронта – во ФИБА Европа Купот, АБА2 лигата и домашното првенство.
Последен пат МЗТ настапуваше во натпреварување под капата на ФИБА во сезоната 2000/01, кога беше дел од Купот Кораќ. Во меѓувреме, клубот беше редовен учесник во АБА лигата, АБА2 и УЛЕБ Еврокупот, а сега повторно ќе ја претставува македонската кошарка на европската сцена.
Новата сезона во ФИБА Европа Купот ќе се игра во проширен формат со 48 екипи, распределени во осум групи од по шест клуба. МЗТ Скопје е меѓу 24-те екипи што обезбедија директен пласман во групната фаза, што значи дека ќе одигра најмалку десет европски натпревари против реномирани противници.
Противниците на македонскиот шампион ќе бидат познати по ждрепката што ќе се одржи на 16 јули во Минхен.
Од клубот истакнуваат дека ги очекува ново европско поглавје, исполнето со големи предизвици, силни натпревари и можност повторно европската кошарка да се врати во спортскиот центар „Јане Сандански“, со надеж дека со поддршката од навивачите достојно ќе ги претстават Аеродром, Скопје и Македонија.
