Американскиот актер Волтер Кениг, најпознат по улогата на Павел Чехов во оригиналната серија „Ѕвездени патеки“, почина на 91-годишна возраст. Тој починал во неделата, од природна смрт, во својот дом во Норт Холивуд, а веста ја потврдил неговиот портпарол. Во последните моменти покрај него биле неговата ќерка Даниел и неговата внука.
Кениг ја започнал актерската кариера во раните 1960-ти со помали телевизиски улоги, но светската слава ја стекнал како рускиот навигатор Павел Чехов во „Ѕвездени патеки“. Се појавил во 36 епизоди од оригиналната серија, а ликот го толкувал и во неколку филмови, меѓу кои „Ѕвездени патеки: Филмот“, „Ѕвездени патеки II: Гневот на Кан“ и „Ѕвездени патеки III: Потрагата по Спок“.
Покрај оваа улога, Кениг настапувал и во сериите „Вавилон 5“ и „Колумбо“, а го позајмувал гласот и за анимирани серии, меѓу кои и „Футурама“. На актерството му останал посветен до крајот на животот, а годинава добил награда на фестивалот „Индипендент шортс авордс“ за улогата во филмот „Господин Флајшман“.
Неговиот приватен живот бил обележан со тешки загуби. Синот Ендру починал во 2010 година, а сопругата Џуди, со која бил во брак речиси 60 години, починала во 2022 година. Зад себе ја оставил ќерката Даниел и бројни обожаватели кои ќе го паметат по улогата на командниот мост на вселенскиот брод „Ентерпрајз“.
