Нелегалната трговија со тестостерон во Грција сè повеќе ги привлекува мажите над 50 години, кои преку интернет реклами и влијанието на јавни личности се убедуваат дека природните промени поврзани со возраста се здравствен проблем што треба да се лекува.
Професорот по ендокринологија на Универзитетот во Патра, Неоклис Георгопулос, предупредува дека тестостеронот треба да се користи само кај мажи со докажано ниско ниво на хормонот. Според него, неконтролираното земање може да го зголеми ризикот од сериозни заболувања и трајно да го наруши природното производство на хормони во организмот.
Иако терапијата со рецепт често е достапна по ниска цена, дел од мажите избегнуваат лекарски прегледи и официјална терапија за употребата да не биде заведена во медицинските записи, што дополнително ја поттикнува побарувачката на црниот пазар.
Минатиот месец грчката полиција извршила претреси во една аптека и две компании во Халандри, при што биле запленети производи со тестостерон означени како „крема за лице“ и „витамин Д“. Според истрагата, дел од производите биле извезувани во странство, меѓу кои и во Шпанија и Финска.
Во судските документи се наведува дека околу 15.000 пакувања биле испратени до клиенти и клиники во странство. Осомничените ги негираат обвиненијата и по распитот биле пуштени да се бранат од слобода.
