Многумина сметаат дека за намалување на шеќерот во крвта е потребно интензивно вежбање, но невронаучничката Џенет Питс посочува дека и кратка физичка активност може да биде корисна.
Како едноставен начин за активирање на големите мускулни групи, таа ги издвојува чучњевите без дополнително оптоварување.
Идејата е едноставна – со активирањето на мускулите на нозете, телото користи повеќе гликоза од крвта. Големиот глутеален мускул е најголемиот мускул во телото, додека четириглавиот мускул на бутот е најголем според волуменот.
„Нозете се вашите најголеми мускули, а најголемите мускули воедно се и најмоќните машини за согорување на гликоза. Кога ги користите, тие го извлекуваат шеќерот од крвотокот со помала потреба од инсулин“, објаснува Питс.
Таа вели дека чучњевите ги вметнува во секојдневните активности – додека ги мие забите, чека да се свари кафето, подготвува вечера или веднаш по оброкот.
„Затоа правам чучњеви во текот на целиот ден – додека ги мијам забите, чекам да се свари кафето, подготвувам вечера или веднаш по оброкот. Две минути овде, две минути таму и на крај се собира“, вели таа.
Сепак, Питс нагласува дека физичката активност не е замена за терапијата.
„Ова не е замена за лековите што ги земате и за сè треба да се консултирате со вашиот лекар. Но, ова е бесплатна алатка која постојано ви е достапна“, посочува таа.
За правилно изведување на чучњевите не е потребна никаква опрема. Треба да се застане исправено со стапалата приближно во ширина на рамената, а прстите благо да бидат свртени нанадвор.
Потоа колковите се туркаат наназад, како да сакате да седнете на стол, и телото се спушта надолу. Тежината треба да остане на стапалата, грбот да биде во природна положба, а градите исправени.
Колената треба да го следат правецот на прстите и да не се вовлекуваат навнатре. При враќањето во почетната положба, потребно е да се поттурнете од подот и да ги исправите нозете и колковите.
За оние кои долго време не вежбале, советот е да започнат постепено и да не ја форсираат длабочината на чучњевот.
Питс препорачува и едноставна изометриска вежба со стискање на дланката, за која наведува дека редовното изведување може да помогне во намалување на крвниот притисок.
