Неколку дена по ненадејната смрт на австралиската манекенка и претприемачка Сахара Реј, на 35-годишна возраст, беше откриен идентитетот на таткото на нејзината ќерка, чиј идентитет таа го чуваше во тајност.
Според порталот ТМЗ, кој имал увид во изводот од матичната книга на родените, татко на девојчето е 38-годишниот Мајкл Бредли Дау. Ќерката на Реј, Сноу, е родена на 27 јануари годинава во болница во Лос Анџелес.
Реј, која во 2016 година медиумите ја поврзуваа со пејачот Џастин Бибер, починала во неделата во болница во Лос Анџелес, опкружена со семејството и пријателите. Според „Дејли мејл“, таа во петокот била итно пренесена во болница по предозирање со фентанил. Нејзиното семејство во неделата донело одлука да ги исклучи апаратите што ја одржувале во живот. Официјалната причина за смртта сè уште не е објавена, а не е познато ниту дали предозирањето било случајно.
Манекенката ја претстави својата ќерка на социјалните мрежи во април, објавувајќи фотографија со песната „Everything Hallelujah“ на Бибер. Нејзината последна објава, во јули, содржеше фотографии од малата Сноу, на кои напиша дека таа е целото нејзино срце.
Од Реј се прости и нејзината мајка, Гретчен Бач, која ја опиша како исклучително посветена и добра млада жена, која ги сакала семејството, модата, сурфањето и својата ќерка. Со емотивна објава од сестра си се прости и нејзината помлада сестра Руби Реј.
Сахара Реј, ќерка на легендарниот сурфер Тони Реј, во последните години ретко се појавуваше во јавноста. Во април 2024 година објави дека ѝ бил дијагностициран Гилбертов синдром, по сообраќајна несреќа во која ја удрил автомобил. Тогаш навела дека поради здравствените проблеми делумно била парализирана и користела инвалидска количка.
