Поранешниот британски тенисер Грег Рудески смета дека овогодишниот Вимблдон можеби бил последната голема можност Новак Ѓоковиќ да ја освои својата 25. гренд слем-титула.
Ѓоковиќ настапот на Вимблдон го заврши во полуфиналето, каде што беше поразен од Јаник Синер.
„Сега ќе му биде потребна многу повеќе среќа. Мислам дека отсуството на Карлос Алкараз од Вимблдон беше голема шанса за него. Влијание имаше и мечот против Феликс Оже-Алијасим, по кој остана без доволно енергија, а Синер одигра извонредно во полуфиналето“, изјави Рудески.
Тој додаде дека не е сигурен дали српскиот тенисер ќе успее да стигне до рекордната 25. гренд слем-титула.
„Не знам дали ќе ја освои 25. гренд слем-титула. Мислам дека ова веројатно беше неговата последна шанса. Но, нека продолжи, бидејќи во тенисот се случувале и почудни работи“, рече Рудески.
Според него, најголемата пречка за Ѓоковиќ е физичката подготвеност.
„Не знам дали физички ќе биде доволно подготвен. Тоа е главното прашање. Ментално е на исто ниво со најдобрите, но едноставно нема доволно енергија за да ја мине последната пречка. Треба во неколку дена по ред да ги победите двајцата најсилни тенисери на турнирот. Сепак, имам голема почит кон него и ако ја освои 25. гренд слем-титула, со задоволство ќе признаам дека сум погрешил“, истакна Рудески.
И покрај поразот на Вимблдон, Ѓоковиќ напредуваше на АТП-листата и моментално се наоѓа на седмото место во светот.
