Принцот Хари доживеал непријатен момент за време на рагби натпревар во петокот во Велика Британија, кога дел од публиката го дочекал со свирежи. Тој го следел натпреварот меѓу Лестер и Глостер без сопругата Меган Маркл, во друштво на директорката на Лестер, Андреа Пинчен.
Кога Хари се појавил на големиот екран на стадионот, се слушнале свирежи, по што телевизиските камери брзо го смениле кадарот. Коментаторот на телевизијата ТНТ, Ник Мулинс, исто така потврдил дека се слушаат свирежи.
Односите на Хари со неговиот татко, кралот Чарлс, и постариот брат, принцот Вилијам, се во центарот на вниманието откако тој и Меган во 2020 година се повлекоа од кралските должности и се преселија во Калифорнија. Подоцна, двојката јавно зборуваше за несогласувањата со кралското семејство, меѓу другото и во документарната серија „Хари и Меган“ од 2022 година и мемоарите на Хари, „Резерва“, објавени во 2023 година.
Според претходни медиумски објави, Хари и Меган размислувале за подолг престој во Велика Британија со своите деца, принцот Арчи и принцезата Лилибет, со цел да бидат поблиску до кралот Чарлс, кој се лекува од рак. Сепак, нивните планови биле проследени со проблеми, а децата наводно биле отпишани од приватно училиште по само два дена поради безбедносни процени.
Според „Пејџ сикс“, Хари и Меган нема да му се придружат на кралското семејство на традиционалната божикна прослава во Сандрингам. Одлуката наводно била донесена за да се избегнат непријатни ситуации за време на празниците.
Медиумските шпекулации дека Хари и Меган планираат да им се извинат на Вилијам и неговата сопруга Кејт Мидлтон за да ги подобрат односите биле отфрлени од експерти за кралското семејство.
