Првата светска тенисерка, Арина Сабаленка, без поголеми проблеми се пласираше во третото коло на ВТА-турнирот од серијата 1000 во Торонто, откако ја совлада Јапонката Мојука Учијима со 6:3, 6:3.
Со оваа победа Белорусинката ја продолжи одличната форма на тврда подлога, каде што сезонава има 24 победи и само еден пораз, претрпен во финалето на Австралија опен.
Иако Учијима поведе со 2:0 на стартот од мечот, Сабаленка брзо ја презеде контролата, освои пет гема по ред и рутински го доби првиот сет. Во вториот сет двете тенисерки разменија брејкови, но светскиот рекет број еден не дозволи изненадување и ја искористи втората меч-топка за победа.
Во третото коло ќе игра против Кинеската Шуаи Жанг, која се пласира понатаму откако Јелена Остапенко го предаде мечот при резултат 6:0, 4:0.
Успешен настап имаше и Ига Швјонтек, која ја победи Сара Бејлек со 6:0, 6:3. Полската тенисерка доминираше во првиот сет, а во вториот успеа да спаси дури девет брејк-топки во клучниот шести гем, по што ја приведе средбата до победа.
Во следната рунда Швјонтек ќе се соочи со Швајцарката Викторија Голубиќ.
Пласман во третото коло обезбедија и Елина Свитолина, која по пресврт ја совлада Џесика Бузас Манеиро, како и Марта Костјук, додека Американката Аманда Анисимова помина понатаму без игра, поради повлекувањето на Тајланѓанката Ланлана Тараруди поради болест.
