Британскиот комичар Расел Бренд изјави дека обвинувањата за силување и сексуален напад му го промениле животот и дека неговите пријатели не сакаат да имаат ништо со него. Тој го кажа ова пред судот во Лондон, каде што продолжува судењето против него.
Бренд сведочеше дека не успеал да убеди ниту еден близок пријател да се појави како сведок во негова одбрана откако во 2023 година јавно беа објавени обвинувањата за кривични дела против жени. На прашањето како тие влијаеле врз него, одговорил дека последиците биле „погубни“.
Тој се изјаснил за невин по три обвиненија за силување, три за сексуален напад и едно за недозволени полови дејствија. Случаите се однесуваат на шест жени и на настани за кои се тврди дека се случиле во периодот од 1999 до 2009 година, пренесува „Мирор“.
Бренд изјавил и дека не се сеќава на жените што го обвинуваат ниту на настаните наведени во обвинението. Според неговото сведочење, по објавувањето на обвинувањата му бил забранет пристапот до болницата „Грејт Ормонд стрит“, каде што во тој период бил хоспитализиран неговиот болен син. Тој посочил дека за забраната биле известени тој и неговата сопруга Лора, но дека не им била наведена конкретната правна основа.
Одговарајќи на прашања за бракот со пејачката Кејти Пери и промените во неговиот живот, Бренд рекол дека во тој период стекнал „неверојатна слава“.
