Во пресрет на полуфиналето на Вимблдон против Јаник Синер, повторно се отвора прашањето дали ова е последната реална шанса Новак Ѓоковиќ да стигне до рекордната 25. гренд слем титула. Иако обложувалниците го сметаат за изразен аутсајдер, многумина веруваат дека шансите се многу поизрамнети отколку што покажуваат квотите.
Вимблдон со години е турнирот на кој српскиот тенисер игра најдобро. Неговото движење на тревната подлога, исклучителниот ритерн и сигурниот сервис се оружја што и понатаму го прават исклучително опасен противник, без разлика на возраста.
Во последните две сезони на гренд слем турнирите Ѓоковиќ не успеваше да ги совлада и Синер и Карлос Алкараз на ист турнир. Кога ќе го победеше едниот, другиот го запираше на патот кон титулата. Овојпат Алкараз не настапува поради повреда, па единствената голема пречка на патот кон финалето е Италијанецот.
Иако Синер е прв светски рекет и фаворит, дел од тениската јавност смета дека неговата доминација во последните месеци не е толку убедлива како претходно. Дополнително, Ѓоковиќ веќе двапати го совлада во полуфинале на Вимблдон, што му дава дополнителна самодоверба.
Новак на овогодишниот турнир повторно покажа дека знае како да победува и во тешки мечеви, а неговото искуство на Централниот терен останува фактор што не смее да се потцени. Од друга страна, Синер до полуфиналето стигна убедливо, но противници од највисока класа речиси и да немаше.
Токму затоа, многумина сметаат дека сценариото во кое Ѓоковиќ ќе се бори рамноправно, па дури и ќе има шанса за победа, е многу поверојатно отколку убедлив пораз, како што прогнозираат дел од аналитичарите и обложувалниците. Дуелот меѓу двајцата ќе покаже дали искуството и традицијата на Вимблдон повторно ќе бидат пресудни.
