Американската турнеја на Ед Ширан доби неочекуван пресврт откако сите преостанати предгрупи најавија дека се повлекуваат од настапите. Меѓу нив е и Финеас, братот на Били Ајлиш, кој порача дека уметниците не треба да бидат замолчувани кога зборуваат во име на потиснатите.
Покрај Финеас, повлекувањето го потврдија и ирскиот кантавтор Арон Роу, данскиот бенд Лукас Греам и ирската фолк-група Беога, која настапуваше со Ширан секоја вечер.
Одлуките уследија откако раперот Меклемор, чие вистинско име е Бенџамин Хегарти, беше отстранет од турнејата по неговите пропалестински изјави на сцената. Ширан во меѓувреме порача дека одлуката не била негова, туку на промоторот.
„Одлуката за заминувањето на Меклемор од турнејата беше одлука на промоторот, а не моја“, напиша Ширан на Инстаграм. Тој додаде дека не сакал да ги разочара обожавателите кои веќе планирале да дојдат на концертите, ниту луѓето од екипата и музичарите кои зависат од турнејата.
Меклемор претходно месецов на два концерта во Њу Џерси повика на „слободна Палестина“ и прикажа снимки од разурнувањата во Газа. Неговите изјави предизвикаа критики од еврејски организации, по што дел од сопствениците на концертните сали извршиле притисок врз промоторите да биде отстранет.
Ширан наведе дека цела недела разговарал со управите на салите и се обидувал да најде заеднички јазик, но промоторот Messina Touring Group на крајот решил да ја прекине соработката со раперот.
Ширан истакна дека е згрозен од конфликтот меѓу Израел и Палестина и дека страдањето на двете страни е човечка трагедија, но објасни дека не сака својата професионална платформа да ја користи како политички форум. Според него, неговата публика ја сочинуваат и млади луѓе и деца од различни средини, кои на концертите не очекуваат политички дебати.
Тој истакна дека го почитува правото на Меклемор јавно да ги застапува своите ставови, но смета дека постојат различни начини за залагање за мир и промени. Додаде дека на сите предизведувачи им било дозволено самостојно да избираат кои песни ќе ги изведуваат.
Сепак, изјавата на Ширан предизвика реакции кај останатите музичари. Лукас Греам порача дека треба да може да се зборува за војната, убивањето цивили и децата кои заслужуваат да растат без оглед на тоа каде живеат.
Арон Роу изјави дека одлуката за повлекување не ја донел лесно, нагласувајќи дека Ширан му е пријател и дека му го променил животот. Беога, пак, порача дека за нив не е прифатливо да настапуваат во простори каде што се замолчуваат оние кои се залагаат за слободна Палестина.
Контроверзата започна на 4 септември, кога Меклемор настапи на концертот на Ширан на стадионот Метлајф во Њу Џерси. Тој тогаш изјави дека еден од главните мотиви поради кои сакал да биде дел од турнејата е можноста пред голема публика да каже „Слободна Палестина“.
Потоа ја изведе песната „Hind’s Hall“, посветена на пропалестинските демонстранти на Универзитетот Колумбија, додека на големиот екран се прикажувале снимки од разурнувања во Газа.
По настапот следувале критики на интернет. Израелско-американскиот совет покренал петиција за негово отстранување од турнејата, додека групата StopAntisemitism го обвинила дека на концертите користи пропаганда.
Следната вечер Меклемор повторно настапил и директно им се обратил на „еврејските браќа и сестри“ во публиката, нагласувајќи дека критиката кон Израел, противењето на, како што рече, апартхејдот и спротивставувањето на геноцидот не претставуваат критика кон нив.
По повеќедневното медиумско внимание, Меклемор во понеделникот објави дека е исфрлен од турнејата. Тој го посочи милијардерот Роберт Крафт, сопственик на стадионот „Џилет“ во Масачусетс, како човек кој организирал бојкот.
Крафт потврдил дека донел одлука Меклемор да не настапува на неговиот стадион, наведувајќи дека тој нема да обезбеди „платформа за говор на омраза“. Го обвини и за, како што наведе, „долга историја на антисемитска реторика“.
Промоторот Messina Touring Group изјавил дека управите на салите им кажале оти нема да дозволат настап на Меклемор, што можело да доведе до откажување на целата турнеја.
Меклемор, пак, порача дека „не постои неутрална позиција меѓу угнетувачот и угнетените“ и дека заземањето страна може да има цена – од пари и договори до спонзорства и настапи. Според него, иако успеал да одржи само два настапа, доколку неговите зборови повторно го насочиле вниманието кон Палестина, тогаш тоа била најуспешната турнеја на која некогаш бил.
