Снуп Дог ќе биде домаќин на овогодишното доделување на музичките награди MTV Video Music Awards, што ќе се одржи на 27 септември. Познатиот рапер, чие вистинско име е Калвин Бродус Џуниор, ќе ја води свеченоста, а воедно ќе биде и извршен продуцент на преносот.
Снуп Дог има долга историја со наградите VMA. Во текот на кариерата бил номиниран 13 пати, а освоил три награди – во 1994 година за најдобар рап-видеоспот, во 2006 година за најдобар денс-видеоспот и во 2015 година за најдобра уметничка режија.
Тој има и неколку запаметени настапи на доделувањето. Во 2022 година настапи со Еминем во настап инспириран од метаверзумот „Otherside“, додека во 2005 година настапи во чест на Ноториус Б.И.Г. Во 1999 година Снуп Дог, заедно со Др. Дре и Еминем, настапи на самиот крај од доделувањето.
„MTV и VMA се дел од мојата приказна уште од самиот почеток. Некои од најголемите моменти во мојата кариера се случија токму на таа сцена и на MTV. Ми дадоа простор хип-хопот да биде гласен, бестрашен и да го види целиот свет“, изјавил Снуп Дог.
Тој додава дека враќањето по сите овие години, овојпат како домаќин, за него е „како враќање таму каде што сè започна“.
Снуп Дог, покрај улогата на домаќин, ќе биде и извршен продуцент на преносот, заедно со Сара Рамакер и Јасмин Ратанси.
На овогодишното доделување посебно признание ќе добие и „Нирвана“, која ќе ја прими наградата Video Vanguard Award. Познатиот американски рок-бенд првпат настапи на сцената на VMA во 1992 година.
Имињата на останатите изведувачи, презентери и специјални гости ќе бидат објавени во следните недели.
Доделувањето на MTV Video Music Awards ќе се одржи во недела, 27 септември, а во САД ќе се пренесува на CBS и MTV, како и на стриминг-платформата Paramount+.
