Филипинскиот министер за внатрешни работи Џонвик Ремула изјави дека досегашните сознанија упатуваат на сомнеж дека Томас Маркл Постариот, таткото на Меган Маркл, би можел да биде сексуален престапник од најтежок вид. Тој нагласи дека надлежните сè уште ги проверуваат доказите и дека форензичката анализа треба да биде завршена во рок од една недела.
Според Ремула, филипинската национална полиција го претресла поранешниот дом на Маркл на Филипините, каде што наводно биле пронајдени големо количество материјали со детска порнографија и лаптоп. Маркл моментално, според написот, се наоѓа во центар за рехабилитација на Флорида, откако му била ампутирана ногата.
Министерот изјавил дека филипинската полиција ќе соработува со своите колеги за да го лоцира Маркл и да преземе соодветни правни мерки доколку се утврдат доволно докази за поднесување обвинение.
Наводите до властите ги пријавил неговиот полубрат Томас Маркл Помладиот, кој тврдел дека во компјутерите и мобилните телефони во поранешниот дом пронашол стотици, можеби и илјадници фотографии што прикажуваат сексуална злоупотреба на деца. Надлежните органи на Филипините ги анализираат дигиталните материјали за кои се тврди дека му припаѓаат на Томас Маркл Постариот.
Тој ги негирал обвинувањата, нарекувајќи ги „болни лаги“. Во изјава за британски медиум, Маркл рекол дека никогаш немал сексуални односи со лице помладо од 18 години.
Според написот, односите меѓу Меган Маркл и нејзиниот татко се нарушени, а таа наводно го прекинала контактот со него минатата година. Сите обвинувања остануваат наводи што треба да бидат утврдени во истрагата.
