(Видео) Тони Михајловски смета дека театарска карта треба да чини 3.000 денари. Еве како го објаснува тоа
Тони Михајловски смета дека редовната цена на билет за театарска претстава треба да биде 3.000 денари. Во „Фала многу пријатно“, актерот го образложи својот став споредувајќи го гледањето снимена содржина со искуството на публиката во театар.
Во театарот, посочи Михајловски, актерот е пред публиката. Таа одблиску гледа како ја игра сцената, дали ќе заплаче и како ќе ја пренесе емоцијата во тој момент. Следната вечер, кога ќе дојде друга публика, актерот повторно ја игра истата претстава.
Неговата споредба беше дел од разговорот за разликите меѓу работата на филм и во театар. Михајловски раскажа дека на снимање понекогаш го добива сценариото вечерта пред да застане пред камера.
Во театар, пак, има повеќе време да го истражува ликот, а работата пред публика се повторува со секоја нова изведба. Токму во изведбата во живо ја гледа вредноста што, според него, треба да ја одразува и цената на билетот.