Фудбалскиот сојуз на Велс стана првата национална федерација што официјално ја повлече поддршката за реизборот на Џани Инфантино за претседател на ФИФА на изборите во 2027 година.
Во писмо испратено до Светската фудбалска федерација, Велшаните наведуваат дека ја изгубиле довербата во Инфантино и неговото раководство, поради обидот за продажба на удел во компанија што би управувала со најважните натпреварувања под капата на ФИФА.
„Неодамнешните пропусти во доброто управување, раководењето, почитувањето на вредностите, односите со засегнатите страни, комуникацијата и расудувањето доведоа до тоа Џани Инфантино да ја изгуби довербата на Фудбалскиот сојуз на Велс да продолжи да го води светскиот фудбал“, се наведува во соопштението.
Од Федерацијата истакнуваат дека ставањето на интересите на фудбалот во втор план е неприфатливо и претставува сериозен пропуст.
Според „Скај спортс“, овој потег е дел од поширока иницијатива координирана од УЕФА, која претходно побара одговорност поради контроверзниот план за комерцијализација на натпреварувањата на ФИФА.
УЕФА во саботата ги осуди, како што наведе, „тајните планови што се спроведуваат со забрзано темпо“, додавајќи дека ќе разгледа сите можни опции за да спречи слични ситуации во иднина.
Се очекува и други национални федерации да го следат примерот на Велс, со што дополнително ќе се зголеми притисокот врз Инфантино да се повлече од функцијата, без формално да биде покренато гласање за недоверба.
Инфантино е на чело на ФИФА веќе десет години и планира да се кандидира за нов мандат. Досега има добиено повеќе од 200 писма со поддршка од вкупно 211 национални федерации, меѓу кои и 52 од 55-те членки на УЕФА.
