Втората фестивалска вечер на 41. издание на фестивалот „Макфест“ се одржа вчера, а признанието за најслушана песна од минатогодишното издание ѝ припадна на пејачката Лара Иванова.
Таа беше наградена за песната „Доминантен“, која, според слушаноста во периодот од одржувањето на минатогодишниот фестивал до денес, се најде на првото место.
За Лара ова е вторпат да добие вакво признание на „Макфест“. Во 2022 година, таа заедно со Пајак беше наградена за песната „Бела“.
Автори на музиката за „Доминантен“ се Лара Иванова и Андреј Николов, додека текстот е дело на Андреј Поповски и Робин Зимбаков. За аранжманот, миксот и мастерингот се погрижи Андреј Николов.
Лара Иванова е едно од препознатливите имиња на помладата македонска музичка сцена, а со ова признание уште еднаш го потврдува успехот на својата музика пред пошироката публика.
