Новак Ѓоковиќ беше одлично расположен по пласманот во полуфиналето на Вимблдон, а на прес-конференцијата со духовит одговор ја насмеа јавноста кога беше спореден со аргентинската фудбалска ѕвезда Лионел Меси.
Српскиот тенисер по голема борба која траеше пет часа и 15 минути го совлада Феликс Оже-Алијасим со 7:6, 3:6, 6:3, 6:7, 7:6 и избори место меѓу четворицата најдобри.
Кога еден новинар забележа дека и на 39-годишна возраст игра на врвно ниво, слично како Меси, Ѓоковиќ низ насмевка одговори:
„Би било убаво да играм само 90 минути како него“, се пошегува српскиот тенисер.
Сепак, наместо фудбалски натпревар, Ѓоковиќ зад себе имаше исцрпувачки меч долг повеќе од пет часа, а очекува дека сличен предизвик го чека и во полуфиналето против Јаник Синер.
Седумкратниот шампион на Вимблдон ќе се соочи со Италијанецот во петок. Нивниот последен меѓусебен дуел беше на почетокот на годината на Австралија опен, кога победата ја однесе Ѓоковиќ.
